मुंबई : एलपीजी सिलिंडरचे नवे दर जाहीर झाले आहेत. एलपीजी सिलिंडरच्या किमतीत ऑगस्टच्या पहिल्या दिवसापासून कपात करण्यात आली आहे. आज गॅस सिलिंडरच्या दरात ३६ रुपयांनी कपात करण्यात आली आहे. या किमती दिल्ली, मुंबई ते चेन्नई आणि देशातील इतर सर्व शहरांमध्ये लागू झाल्या आहेत. दरम्यान, २१ मे पासून भारतातील इंधनाचे दर स्थिर आहेत. १ ऑगस्ट रोजी पेट्रोल आणि डिझेलचे दर अबाधित राहिले आहेत, त्यामुळे लोकांना दिलासा मिळाला आहे.
व्यावसायिक सिलिंडरवर एलपीजी सिलिंडरमध्ये दिलासा दिला जातो. इंडियन ऑइलच्या नवीन दरानुसार आता दिल्लीत १९ किलोचा व्यावसायिक एलपीजी सिलिंडर १९७६.५० रुपयांत मिळणार आहे. यापूर्वी सिलिंडरची किंमत २०१२.५० रुपये होती. शेवटची दरकपात ६ जुलै रोजी करण्यात आली होती. त्यानंतर व्यावसायिक सिलिंडरची किंमत २०२१ रुपयांवरून २०१२ रुपये करण्यात आली.
दुसरीकडे, घरगुती एलपीजी सिलिंडरबद्दल बोलायचे झाले तर सध्या दिल्लीत घरगुती एलपीजी सिलिंडरची किंमत १०५३ रुपये आहे. यापूर्वी १९ मे रोजी या किमती बदलण्यात आल्या होत्या, त्यानंतर किमती १००३ रुपयांवरून १०५३ रुपये करण्यात आल्या होत्या. सध्या कोलकात्यात घरगुती एलपीजीची किंमत रु.१०७९, मुंबईत रु.१०५२ आणि चेन्नईमध्ये १०६८.५० रु आहे.
याशिवाय ऐतिहासिक आकडेवारी पाहिली तर गेल्या आठ वर्षांत एलपीजी सिलिंडरच्या किमतीत सुमारे अडीच पटीने वाढ झाली आहे. सरकारी तेल विपणन कंपनी इंडियन ऑइल कॉर्पोरेशन (आयओसीएल) च्या आकडेवारीनुसार मार्च २०१४ मध्ये अनुदानित एलपीजी सिलिंडरची किंमत ४१० रुपये होती.
